Պոլսո հայոց պատրիարքարանի հոգևոր խորհրդի նախագահ, արքեպիսկոպոս Արամ Աթեշյանը հայտնել է, թե Վանա լճի Աղթամար կղզու հայկական պատմական Սուրբ Խաչ եկեղեցու գմբեթին` սեպտեմբերի 19-ին մատուցվելիք պատարագի օրը, խաչ չի լինելու: Նա ասել է, թե իբր` եկեղեցու գմբեթի համար նախատեսված 200 կիլոգրամանոց խաչը տեխնիկական պատճառներով հնարավոր չի լինի մինչև պատարագի օրը ամրակցել գմբեթին: Փոխարենը այցելություններն ուղղակի կկարողանա տեսնել խաչը` միայն թե ոչ գմբեթին:Հետաքրքիր է, թե թուրքերը ի՞նչ նոր հնարք կմտածեն հայկական խաչը ինչ-որ տեղ պարտակելու համար, միայն թե այն չտեղադրվի հայոց եկեղեցու գմբեթին:

Իսկ հիշո՞ւմ եք, 2007-ին, Աղթամարի Սուրբ Խաչ եկեղեցու վերականգնումից հետո բացման հանդիսավոր արարողության ժամանակ, ինչպես էին թուրքերն իրենց իրավունք վերապահել հայկական ճարտարապետական կոթողը «զարդարել» թուրքական դրոշներով և Աթաթուրքի դիմանկարներով, այն դեպքում, երբ արդեն երրորդ տարին է  քրիստոնեկան եկեղեցու գմբեթին ոչ մի կերպ «հնարավոր չի լինում» խաչը տեղադրել:

Վասպուրականի թագավոր Գագիկ Արծրունին և նրա գլխավոր ճարտարապետ Մանուիլը երբևէ կարո՞ղ էին ենթադրել, որ մի օր Սուրբ Խաչ տաճարը կզարդարվի թուրքական դրոշներով, Աթաթուրքի պատկերով, փոխարենը եկեղեցուց հեռացված կլինի քրիստոնեության խորհրդանիշը` խաչը:

Թուրքական «Միլլիյեթ»օրաթերթը նաև տեղեկացնում է, որ Արքեպիսկոպոս Արամ Աթեշյանը հանդիպում է ունեցել Վանի նահանգապետ Մյունիր Քարաօղլուի հետ` սեպտեմբերի 19-ի նախապատրաստական աշխատանքների մասին տեղեկանալու նպատակով: Նրա գլխավորած պատվիրակությունը հյուրընկալվել է նաև Վանի առևտրաարդյունաբերական պալատում և քաղաքապետարանում: Քաղաքապետ Բեքիր Քայայը արքեպիսկոպոս Աթեշյանին հավաստիացրել է, թե իրենք սեպտեմբերի 19-ին հյուրամեծար ձևով հարգելու և պատվելու են Վան ժամանելիք հայ ուխտավորներին:

Ինչ հարգանք-պատվի մասին կարող է խոսք լինել, երբ թուրքական իշխանություններն իրենց գործելաոճին հարիր, հերթական անգամ մերժում են նախապես տրված խոստումը ու անհիմն պատճառաբանությամբ հրաժարվում Աղթամարի Ս. Խաչի գմբեթին Խաչը տեղադրել: Այսքանից հետո հարց է առաջանում, արդյոք, պե՞տք է, որ հայ հոգևորականները մեկնեն մասնակցելու մի արարողության, որն այլ բան չի լինելու, քան հերթական թուրքական շոու: