Արցախի Հանրապետության վարչապետ Արա Հարությունյանի գլխավորությամբ անցկացված խորհրդակցության ժամանակ քննարկվել են գյուղատնտեսական հարցեր: Խորհրդակցությանը ներկա գյուղնախարար Ա.Ծատրյանը և շրջվարչակազմերի ղեկավարները վարչապետին իրազեկել են աշնանացանի ընթացքի վերաբերյալ:

Գյուղնախարարի տեղեկատվությամբ` առ այսօր հանրապետությունում կատարվել է ավելի քան 20 հազար հեկտար հերկ: Բուն ցանքի աշխատանքները դեռ առջևում են: Վարչապետը հրահանգեց հետևել, որպեսզի ապահովվի լրիվ ցանքաշրջանառությունը, օգտագործվի որակյալ սերմացու և կիրառվեն անհրաժեշտ ագրոկանոնները: Այդ նպատակով հողագործների համար առաջիկայում մասնագիտական հիմնավոր խորհրդատվություններ կկազմակերպվեն շրջաններում: «Պետք է անցնել գյուղատնտեսության ինտենսիվ զարգացմանը»,- հայտարարել է կառավարության ղեկավարը:

Խորհրդակցությունում քննարկվել են նաև գալիք տարվա գարնանացանի նախապատրաստության, գյուղտեխնիկայի թարմացման և պահեստամասերով ապահովման, չմշակվող հողատարածքների վաճառք կազմակերպելու հետ կապված հարցեր: Դրանց առթիվ վարչապետը հանձնարարականներ տվեց ներկաներին:

Այս մասին ArmAr.am-ին տեղեկացնում է Արցախի Հանրապետության կառավարության տեղեկատվության և հասարակայնության հետ կապերի վարչությունը: