Այսօր` դեկտեմբերի 6-ին, Ազգային ժողովի հերթական քառօրյա նիստերի օրակարգում ընդգրկված է  «Լեզվի մասին» եւ «Հանրակրթության մասին» օրենքներում փոփոխությունների օրինագիծը, որով նախատեսվում է բացել օտարալեզու դպրոցներ:

Ինչպես տեղեկացրել ենք «Մենք դեմ ենք օտարալեզու դպրոցների վերաբացմանը» նախաձեռնող խումբը կազմակերպում է բողոքի ցույց Ազգային ժողովի հարակից տարածքում:

ArmAr.am էլեկտրոնային օրաթերթին հայտնի դարձավ, որ օրերս ՀՀ Հանրային Խորհրդի Կրոնի,սփյուռքի և միջազգային ինտեգրման հանձնաժողովի Պատմական-ազգային արժեքների, հուշարձանների պահպանության, պատկանելության և օգտագործման խնդիրների ենթահանձնաժողովը որոշում է կայացրել ՀՀ հանրակրթության համակարգում պետական օտարալեզու դպրոցների ստեղծման վտանգավոության մասին:

Որոշման մեջ ասվում է.

ՀՀ Կրթության և գիտության նախարարության նախաձեռնությունը` ՀՀ հանրակրթական համակարգում ստեղծել օտարալեզու դպրոցներ` հիմնավորված չէ և բացարձակապես անընդունելի է բոլոր առումներով:

Օտարալեզու դպրոցների ստեղծումը անսքող մարտահրավեր է Հայաստանում հայոց լեզվի գերակայության գաղափարին և հայոց լեզվի` որպես պետական լեզվի սահմանադրորեն և օրենսդրորեն ամրագրված սկզբունքին:

Օտարալեզու դպրոցների ստեղծումը է′լ ավելի կուժեղացնի այսօր իսկ գոյություն ունեցող անվստահությունը հայոց լեզվի հանդեպ, մեծապես կնպաստի օտարամոլության արմատավորմանը:

Օտարալեզու դպրոցների ստեղծումը մեծապես կվնասի նաև հայ ազգային մշակույթի հետագա զարգացմանը:  Նման դպրոցների առկայությունը լուրջ խնդիրներ կառաջացնի ազգային անվտանգության բնագավառում:

Օտարալեզու դպրոցների ստեղծումով ավելորդ լարվածություն կառաջանա հայ հասարակության մեջ, ինչպես նաև կբազմապատկվեն կրթական համակարգում այժմ արդեն ցայտունորեն դրսևորվող կոռուպցիոն երևույթները:

Ելնելով վերոշարադրյալ նկատառումներից, ՀՀ ՀԽ Կրոնի,սփյուռքի և միջազգային ինտեգրման հանձնաժողովի Պատմական-ազգային արժեքների, հուշարձանների պահպանության, պատկանելության և օգտագործման խնդիրների ենթահանձնաժողովը որոշում է.

1. ՀՀ-ում օտարալեզու դպրոցների ստեղծումը ցանկացած տեսքով և ցանկացած քանակով համարել վնասակար, անթույլատրելի և ՀՀ Սահմանադրությանը հակասող:

2. Օրենսդրորեն ամրագրել, որպեսզի հետայսու ՀՀ Կրթության և գիտության նախարարի թե′ միջնակարգ, թե′ բարձրագույն կրթությունը պարտադիր կերպով լինի հայկական:

ArmAr.am