Այս հարցի, նաև հնարավոր հեղափոխության հարցի շուրջն էին պտտվում մի քանի գործիչներ: Ժիրայր Սեֆիլյանը դառնացած հարց է տալիս. «Ասենք, Սերժ Սարգսյանը գնաց…, տարան – ո՞վ է փոխարինելու»: Կարո Եղնուկյանը շարունակում է. «Սերժ Սարգսյանը չլինի՝ Պողոս Պողոսյանը լինի…: Փոխարինող համակարգ է պետք»:

Այս մարդկանց չեմ ուզում նորից դիպչել, բայց մի ծանր հարց ուզում եմ տալ. «Որ էս հարցի պատասխանը չունե՜ք – ո՞րն է ձեր գործի անունը»: Հայ ժողովրդին անտեր, անհեր ու անմեր ե՞ք կարծել: Դե հիմա ուշադիր լսեք, ձեր դրած հարցին եմ պատասխանելու: Եթե Սերժ Սարգսյանը գնա՝ տեղը ոչ նախկին նախագահներից մեկը պիտի գա, ոչ նախագահացուներից մեկը, ոչ կուսակցապետ, ոչ ձեզնից մեկը… Բա ո՞վ… Լավ լսեք – գնալու ենք Քարահունջ, Զորաց Քարեր – մի լավ քար ենք գտնելու, վրան անցք՝ որ ԱՍՏՂԵՐԻՆ նայենք, բերելու ենք՝ հրապարակում դնենք ու մեզ նախագահ կընտրենք: Եթե Քարը ինքնաբացարկ տա, կողքի ոչխարի հոտի ՀՈՎԻՎԻՆ կկանչենք, որ գիտի իր հոտին խնամելու ՕՐԵՆՔՆԵՐԸ… Հովվին կընտրենք մեզ նախագահ:

Լավ: Բա ինչ ՀԱՄԱԿԱՐԳՈՎ փոխարինենք ներկա ողորմելի դրվածքը: Արդեն ասացի՝ ՀՈՎԻՎԸ գիտի օրենքները: Կարո Եղնուկյան, ի՞նչ ասացի՞ք – «Փոխարինող համակա՞րգ է պետք»: Կարո Եղնուկյան, համակարգը ստեղծված է – ԱԶԳԱՅԻՆ ՄՇԱԿՈՒՅԹԻ գործող համակարգը: Կրողները կան: Մի շարք տեխնոլոգիական խնդիրների լուծում ու դրվածք՝ Ամերիկայից ու Եվրոպայից փոխ կվերցրենք: Ամոթ չէ:

Հա, չմոռանամ ասել, վարչապետ կառաջարկենք Տաթևի Սյունը – էս քարի սիրտը ավելի կենդանի է ու իմաստուն, քան ներկա վարչապետինը: Եթե Տաթևի Սյունը չհամաձայնեց՝ մեր Քյավառում մի գառնարած կգտնենք, նա էլ վարչապետ կլինի…

Ով հումորը լավ չընկալեց – ասեմ. ՀԱՅ ԱԶԳԸ ունի ինքնակառավարման գիտելիքը ՝ իր գենի, մշակույթի, ընտանեկան աստիճանակարգի մեջ: Իշխանության պիտի բերենք դրանց ԿՐՈՂՆԵՐԻՆ: Պինդ կացե՜ք: Կարթնանաք, կտեսնեք – Նոր Պետության ստեղծման համար ԱՄԵՆ ԻՆՉ ունենք…

Լևոն Դռնոյան

21.11.2013