«The Armenian Reporter» թերթին տված հարցազրույցում Հայաստանի Հանրապետության նախագահ Սերժ Սարգսյանն ասել է, թե հայկական կողմը երբեք թույլ չի տա սակարկության առարկա դարձնել Լեռնային Ղարաբաղի կարգավիճակի հարցը:

Նախագահը, պատասխանելով թղթակցի հարցին, թե արդյո՞ք, Հայաստանը դեռ հավատարիմ է մնում Ղարաբաղի` Ադրբեջանին «ենթակայության անհնարինության» քաղաքականությանը, նախագահ Սերժ Սարգսյանն ասել է. «Արցախյան խնդրի կարգավորման առանցքը` Լեռնային Ղարաբաղի կարգավիճակն է: Ղարաբաղյան շարժումը սկսվել է կարգավիճակի խնդրից, և այդ խնդրի կարգավորումը միայն կարող է բերել հակամարտության լուծման: Հայաստանը բազմիցս հայտարարել է, որ Ղարաբաղի ժողովուրդը պետք է հնարավորություն ունենա որոշելու, թե ինչպիսին պետք է լինի այդ կարգավիճակը: Դա այն կարմիր գիծն է, որից այն կողմ հայկական կողմերը չեն կարող գնալ, դրանք ենթակա չեն սակարկության»:

Միևնույն ժամանակ նախագահ Սերժ Սարգսյանն ընդգծել է. «Արցախի հիպոթետիկ ենթակայությունը Ադրբեջանին հնարավոր է միայն մեկ դեպքում, եթե Արցախի ժողովուրդը հանրաքվեով ինքը որոշի այդ մասին: Իսկ թե որքա՞ն է դրա հավանականությունը՝ հայտնի է բոլորին, նույնիսկ ադրբեջանցիներին»:

Armar.am