Ամերիկայի Արեւմտյան շրջանի երեք ազգային կուսակցությունները` Դաշնակցությունը, Սոցիալ Դեմոկրատ Հնչակյան եւ Ռամկավար Ազատական կուսակցությունները հանդես են եկել համատեղ հայտարարությամբ, Հայաստանի Նախագահի` հոկտեմբերի 4-ին Լոս-Անջելես կատարելիք այցի վերաբերյալ` շեշտելով, որ թեև ներկա են գտնվելու նախագահի հետ խորհրդակցական հանդիպմանը, որպեսզի ուղղակիորեն նախագահին փոխանցեն նախաստորագրված արձանագրություններին արմատապես հակադրվելու իրենց հիմնավորումները, այնուամենայիվ, որոշել են ներկա չգտնվել ճաշկերույթին, որ նույն օրը կազմակերպվելու է ի պատիվ նախագահի: Հայտարարության մեջ նշված է.«Ի տես նախագահի կողմից ազգավնաս փաստաթղթի տակ ստորագրելու անհասկանալի ու դատապարտելի աճապարանքի, չենք կարող մեր վիրավորանքը չթաքցնել, եւ մեր ժողովրդի համար սև թվականի նախօրեին չենք կարող մասնակցել ի պատիվ նախագահի կազմակերպված հանդիսավոր որևէ միջոցառման, որը միայն ու միայն նվիրագործում է մեր պատմության, մեր նահատակների հիշատակի, մեր ազգային արժանապատվության ու մեր հավաքական համոզումների դեմ նետված արհամարհանքը ու նսեմացնում է մեր ազգային պահանջատիրական պայքարը»: