ԵԱՀԿ Մինսկի խմբի համանախագահները Լեռնային Ղարաբաղի խնդրի խաղաղ կարգավորման ուղղությամբ ձեռնարկվող քայլերի վերաբերյալ լուրջ բանակցություններ են ակնկալում Ադրբեջանի իշխանությունների հետ։ Այդ մասին հայտարարել է Մինսկի խմբի ամերիկացի համանախագահ Ջեյմս Ուորլիքը Twitter-ի իր միկրոբլոգում:

«Մենք լուրջ բանակցություններ ենք ակնկալում Ադրբեջանի նախագահի և մյուսների հետ՝ Լեռնային Ղարաբաղի խնդրի խաղաղ կարգավորման ուղղությամբ ձեռնարկվող քայլերի վերաբերյալ: Բոլորը կարող են շահել»,- գրել է Ուորլիքը Twitter-ում:

ԵԱՀԿ Մինսկի խմբի համանախագահներ Ջեյմս Ուորլիքը (ԱՄՆ), Իգոր Պոպովը (Ռուսաստան) և Պյեր Անդրյոն (Ֆրանսիա) երկուշաբթի օրը ժամանել են Բաքու՝ ղարաբաղյան հակամարտության խաղաղ կարգավորման հարցով Ադրբեջանի ղեկավարության հետ բանակցությունների համար, հայտնում է trend.az-ը:

Հաղորդվում է, որ այցի ընթացքում համանախագահները նաև հանդիպումներ կունենան Ադրբեջանի արտգործնախարար Էլմար Մամեդյարովի և պաշտպանության նախարար Զաքիր Հասանովի հետ:

Մինսկի խմբի համանախագահները Երևան կժամանեն փետրվարի 17-ին: