Արցախի նախագահը չի պատրաստվում հրաժարական տալ, երեկ Արայիկ Հարությունյանը խորհրդարանի իր թիմակիցների հետ վերահաստատել է, որ չի հեռանալու։

Իշխանական պատգամավոր, Արցախի խորհրդարանի «Ազատ հայրենիք-ՔՄԴ» խմբակցության նախագահ Արամ Հարությունյանը ասել է.«Նախագահը չի պատրաստվում հրաժարական տալ, մնացած ամեն ինչը խոսակցույթունների տիրույթում են, կա հստակ որոշում, նման բան չի նախատեսվում»: Ըստ իշխանության ներկայացուցչի` ներքաղաքական պայքարը կանգ չի առնում, աթոռակռիվ է:

Մինչդեռ ընդդիմադիր «Արդարություն» խմբակցության ղեկավար Դավիթ Գալստյանը նկատում է` աթոռակռվի միակ մասնակիցը Արայիկ Հարությունյանն ինքն է:

«Ես համոզված էի, որ Արայիկ Հարությունյանը հրաժարական չի տալու, հերթական մանիպուլյացիան է, որը միտված է իր իշխանությունը երկարաձգելուն, թե իբր կառչած չի իր աթոռից, բայց բոլոր փաստերը խոսում են հակառակի մասին», – ընդգծեց Գալստյանը:

Գալստյանի տեղեկացմամբ՝ երեկ խորհրդարան են մտել աշխարհազորի մի խումբ մարտիկներ՝ գլխավոր հարցով՝ այդ ո՞վ է այստեղ պահանջում Հարությունյանի հրաժարականը. – «Թե ովքեր են այն պատգամավորները, որոնք Արայիկ Հարությունյանի հրաժարականն են պահանջում, իրենց կողմից ընտրված նախագահն է Արայիկ Հարությունյանը և իրենց կողմից ընտրված նախագահի հրաժարականը, որևէ պատգամավոր չի կարող պահանջել»:

Պատգամավորը վստահ է՝ հրաժարականի լուրերի այս հոսքերը նախագահը գծում, նախագահն էլ հերքում է։ Ինչո՞ւ։

«Երևի թե Արայիկ Հարությունյանը նորից զգացել է, որ դժգոհությունները աճում են ու փորձել է ցույց տալ, որ նա միակ մարդն է, ով կարող իրավիճակը և՛ սրել, և՛ հանդարտեցնել», – ասաց Դավիթ Գալստյանը:

Արցախցիները նախագահից դժգոհելու հիմքեր ունեն, ըստ Գալստյանի, կառավարությունն անգործություն է ցուցաբերում՝ պաշարման պայմաններում եղած ռեսուրսը ճիշտ չի կառավարվում, կարող էին ապահովել, որ գյուղերից բերքը հասնի մայրաքաղաք, շտապօգնության մեքենաներն անգամ վառելիք չունեն, միայն ինսուլտ-ինֆարկտի համար են օգտագործվում: Պատգամավորը նկատում է, որ այժմ ոչինչ չի արվում ձմռանը նախապատրաստվելու համար և տպավորություն ունի, որ Արցախի իշխանությունը մինչև ձմեռ պլանավորում է ինտեգրում Ադրբեջանի հետ։

«Փորձում են հասցնել այն անելանելի իրավիճակին, որ վերջում կա՛մ սկսեն օգտվել Աղդամի ճանապարհից, կա՛մ գնան մտնեն Ադրբեջանի հետ երկխոսության՝ ինտեգրացիայի հարցով», – ասաց Գալստյանը: