Թուրքական մամուլի ուշադրությունից զերծ չի մնացել այն փաստը, որ արևմտյան մամուլը  մեծ հետաքրքրությամբ հետևում է  հայ-թուրքական հարաբերությունների գործընթացին և  արձանագրությունների ստորագրմանը:

Թուրքական պարբերականներին զայրացրել է, մասնավորապես, բրիտանական «The Economist» թերթի  մեկնաբանությունները, ինչի առնչությամբ թուրքական «Ջումհուրիյեթ» թերթը գրում է. անգլիական պարբերականը, դատելով սփյուռքահայության ցույցերից, եզրակացրել է, որ թեպետ փորձ է արվում  հայերի ու թուրքերի միջև  նոր համաձայնություն ձեռք բերել, բայց հին վեճերը դեռ շարունակվում են: Ավելին, բրիտանական պարբերականը Էրդողանի` Ղարաբաղի հարակից տարածքներից որոշներն Ադրբեջանին վերադարձնելու   մասին արած հայտարարությունները մեկնաբանել է այնպես, թե Թուրքիային մեծ քանակությամբ գազ և նավթ վաճառող Ադրբեջանը փորձում է մերձենալ Ռուսաստանին: Ահա թե ինչն է այդչափ  վախեցրել Անկարային, որն էլ նման հայտարարություններով  ամեն կերպ փորձում է  կանխել Ադրբեջան-Ռուսաստան մերձեցման վտանգը:

Միաժամանակ «The Economist»-ը գրում է, եթե նույնիսկ Թուրքիան ստորագրի արձանագրությունները, բայց չվավերացնի դրանք, ապա անզոր կլինի կանխել ԱՄՆ Կոնգրեսում Հայոց Ցեղասպանության բանաձևի ընդունումը: Ասել է թե, Թուրքիան հայտնվել է դժվարին ընտրության առջև:

Ք.Մ.

Թեգեր` Ադրբեջան-Ռուսաստան, Բրիտանական «The Economist», Թուրքիա, ցեղասպանություն