Ադրբեջանի մայրաքաղաք Բաքվի «Շեհիտների պուրակից» հոկտեմբերի 15-ին հանվել են Թուրքիայի դրոշները:   Ադրբեջանի պաշտոնական աղբյուրների փոխանցմամբ , դրոշը վերականգման նպատակով է իջեցվել: Սակայն կարծիք կա, որ դա պատասխանն է այն բանի, որ հոկտեմբերի 14-ին Բուրսայում կայացած Թուրքիա-Հայաստան ֆուտբոլային խաղի ժամանակ մարզադաշտում լուսանկար է արվել, որում պատկերված է «զուգարան» մակագրությամբ մի տուփ` մեջը Ադրբեջանի դրոշներ։

Թուրքական դրոշի հանման կապակցությամբ Թուրքիայում արդեն հնչում են առաջին արձագանքները:

Այսպես. արտգործնախարար Ահմեդ Դավութօղլուն հույս է հայտնել, որ ադրբեջանական կողմը  դրոշի նկատամամբ կցուցաբերի անհրաժեշտ ուշադրություն: Նա ասել է. «Ադրբեջանի դրոշը Թուրքիայի համար սրբազան է այնքան, որքան իր սեփականը»: Հետաքրքիրն այն է, որ Դավութօղլուն առիթը բաց չի թողել խոսել  Լեռնային Ղարաբաղի հարցը մասին, ասելով, թե. «Ղարաբաղյան խնդիրը, ինչպես Ադրբեջանի, այնպես էլ  Թուրքիայի ազգային հարցն է հանդիսանում»: Նույնիսկ նկատել է. «Ադրբեջանի տարածքները սրբազան են մեզ համար այնքան, որքան մեր հողերը»:

Թուրքիայի խորհրդարանի խոսնակը ևս անդրադարձել է թուրքական   դրոշների իջեցման խնդրին ու  հայտարարել, որ ոչինչ չի կարող ստվերել թուրք-ադրբեջանական հարաբերությունները:

Թուրքական կողմի այս հայտարարություններից  ակնհայտ  է դառնում, որ պաշտոնական Անկարան համոզված է, որ դրոշների իջեցման իրական պատճառը ոչ թե դրանց կտորի վերանորոգումն է, ինչպես ներկայացնում է ադրբեջանական  կողմը,  այլ որ այն  զուտ քաղաքական նպատակներ է  հետապնդում:

Armar.ar