ԱԺ ՀՅԴ խմբակցության քարտուղար Արտաշես Շահբազյանի կարծիքով, եթե Հայաստանի դիվանագիտությունը լիներ կազմակերպված, խելացի, ուժեղ, ապա Թուրքիայի հետ հարաբերություններ սկսելուց առաջ պայման կդներ որեւէ գործընթաց սկսել միմիայն սահմանի բացումից հետո: Բայց քանի որ իշխանությունը նման քայլերի չդիմեց, եւ հայ-թուրքական արձանագրություններն էլ Դաշնակցությունն ու նրան համագործակցող ուժերը համարում են անընդունելի, ուստի Ա. Շահբազյանը անհրաժեշտ է համարում ողջ ժողովրդի համագործակցությունը` ձախողելու համար հայ-թուրքական հարաբերությունների կարգավորման ներկա գործընթացը:

«Կան խնդիրներ, որոնք չի կարելի վերածել ներքաղաքական հաշիվների: Տխուր օրինակ բերենք մեզ համար, որ մեր հարեւանները` Թուրքիան, Ադրբեջանը եւ Վրաստանը, իրենց ազգային հարցերում երբեք չի լինում, որ ներքին տարաձայնություն ունենան»,- այսօր «Հայացք» մամուլի ակումբում ասուլիսի ժամանակ հայտարարեց ՀՅԴ գործիչը` հույս հայտնելով, որ նման վճռականություն կլինի նաեւ Հայաստանում:

Ա. Շահբազյանը վստահ է, որ Թուրքիայի խորհրդարանը կվավերացնի արձանագրությունները` առանց որեւէ վերապահման, որովհետեւ դա հայկական կողմին եւս նույն ճանապարհով կտանի: Իսկ Թուրքիան կվավերացնի, որովհետեւ ամբողջությամբ իր շահերից է բխում:

Ա. Շահբազյանը կարծում է, որ Ղարաբաղյան խնդրի կարգավորումը տարվում է հայ-թուրքական հարաբերությունների կարգավորմանը զուգահեռ: Դա, ինչպես նաեւ Ղարաբաղի հարցը որպես նախապայման լինելու մասին տեսակետներն ապացուցում են արձանագրությունների ստորագրման արարողությանը ԵԱՀԿ Մինսկի խմբի համանախագահող երկրների ԱԳ նախարարների մասնակցությունը: «Ի՞նչ կապ ունի հայ-թուրքական հարաբերությունների ընթացքը ԵԱՀԿ Մինսկի խմբի համանախագահողների հետ: Չե՞նք տեսնում, որ սրանք իրար կողք են դրված»,- նշեց դաշնակցական գործիչը` անընդունելի համարելով հայաստանյան քաղաքական գործիչների, իշխանությունների եւ վերլուծաբանների պնդումները, թե Ղարաբաղի հարցը հայ-թուրքական հարաբերություններին կապելու թուրքական կողմի հայտարարությունները ներքին սպառման համար են. «Ի՞նչ է նշանակում Թուրքիայի պես կազմակերպված երկրում ներքին սպառման համար սուտ խոսել: Սա այդ երկիրը չէ: Թուրքիան կազմակերպված երկիր է: Այս երկրում այդպիսի սուտ խոսելով, ճարպկություն անելով քաղաքականություն տանել հնարավոր չէ: Գուցե մեր իշխանությունները հերքում են ներքի՞ն օգտագործման համար»: Ա. Շահբազյանի խոսքերով, ինչպես որ պարտադրվեց արձանագրությունների ստորագրումը, նույնկերպ կպարտադրվի նաեւ Ղարաբաղյան խնդրի կարգավորումը, այլապես, ըստ նրա, իմաստ չի ունենա այս փուլի գլուխ բերելը:

Ինչ վերաբերում է ՀԱԿ-ի եւ Դաշնակցության համագործակցության շուրջ տեսակետներին, Ա. Շահբազյանը նշեց, որ Դաշնակցությունը պատրաստ է համագործակցել բոլոր ուժերի հետ, ովքեր դեմ են հայ-թուրքական հարաբերությունների ներկա գործընթացին: «Մենք այսօր ազգի համար ճակատագրական, պատմական եւ կենսական ենք համարում այս փաստաթղթերի մերժումը կամ բարեփոխումը: Որեւէ ուժ, որ կընդունի մեր մտահոգությունները, պատրաստ ենք մեր կողքին տեսնելու եւ կանգնելու իր կողքին եւ պայքարելու այս հարցերի համար: Այլ խնդիրներ, որոնք մասնավոր հարցեր են լուծում, թե ում ինչ աթոռ բաժին կընկնի, այսօր մենք այնքան չենք կարեւորում, որ հիմնական հարցերը թողնենք եւ ընկնենք երկրորդական հարցերի հետեւից: Խնդրեմ, եթե մարդիկ կգան, կմիանան սկսված պայքարին, մենք պատրաստ ենք համագործակցելու: Այլ դեպքում այդ համագործակցությունն ինքնանպատակ կլինի եւ անիմաստ: Պետք է բոլոր քաղաքական ուժերը պատասխանատվությունը վերցնեն իրենց վրա: Վաղը ոչ մի ուժ չպետք է ասի, թե ես այս-այս պատճառներով մասնակից չեղա: Կամ դու պատասխանատվություն ես կրում, կամ դառնում ես անպատասխանատու ազգի համար կարեւորագույն խնդիրներում: Սա այն հարցը չէ, որ հավակնություն ունենանք, անջրպետ լինի: Ուրախ կլինենք, որ բոլորս միասնաբար գնանք առաջ: Մենք այլ խնդիրներ չունենք, երբ հրապարակ ենք կանչում ժողովրդին»,- նշեց Արտաշես Շահբազյանը:

Դաշնակցության հետագա պայքարի մասին խոսելով` ՀՅԴ գործիչն ասաց, որ Դաշնակցությունը դեռ հույս ունի օրինական ճանապարհով կասեցնել ներկա գործընթացը: Օրինական ճանապարհը Դաշնակցության համար Սահմանադրական դատարանում տարվելիք աշխատանքն է, որպեսզի հակասահմանադրական ճանաչվեն արձանագրությունները: Հաջորդ օրինական ճանապարհը Աժ քնարկումներն են: Այստեղ հաջողություն չունենալու դեպքում, ըստ դաշնակցական գործչի, կլինեն մնացած քայլերը:

Armar.am