Տիգրան Բալայանը հակադարձում է Դավութօղլուն
Թուրքիայում երեկ մեկնարկած հայ-թուրքական արձանագրությունների վավերացման շուրջ խորհրդարանական լսումների ընթացքում Թուրքիայի արտգործնախարար Ահմեդ Դավութօղլուն, ինչպես միշտ, իր «բարձրության» վրա էր։ Նա, ինչպես և ենթադրվում էր, իր ելույթը կառուցել էր՝ շեշտադրումներ անելով այն նախապայմանների վրա, որոնցով մտահոգված են Հայաստանում և Սփյուռքում ապրող մեր հայրենակիցներից շատերը։
Ի՞նչ տեսակետ ունի Դավութօղլու հայտարությունների շուրջ ՀՀ ԱԳ նախարարությունը։
Մեր հարցերին պատասխանում է ՀՀ ԱԳՆ մամուլի և տեղեկատվության վարչության պետի պաշտոնակատար Տիգրան Բալայանը:
-Պարոն Բալայան, Թուրքիայի ԱԳ նախարարը նշել է, որ նույնիսկ վարչակազմի փոփոխման ժամանակ հնարավոր չէ դուրս գալ այն պայմանագրերից, որոնց կետերով սահմաններ են սահմանվում, ուստի այս արձանագրություններով Թուրքիան հասել է իր գլխավոր նպատակներից մեկին՝ Հայաստանը և Թուրքիան ընդունելու են միմյանց տարածքային ամբողջականությունը, որը և ենթադրում է Կարսի պայմանագրի վերահաստատում։ Ի՞նչ կասեք այս մասին։
-Արձանագրությունների տեքստերը հրապարակված են, այնտեղ Կարսի պայմանագրի մասին խոսք չկա։
-Պատմաբանների խումբ ստեղծելու առնչությամբ հայտարարել է, թե դրանով «նոր շունչ կտրվի պատմությանը»։ Գիտական և անկողմնակալ ուսումնասիրությունն էլ, ըստ թուրքական կողմի այն է, որ Հայաստանը ընդունի այն մոտեցումը, թե հնարավոր չէ հարցերը լուծել միակողմանի ընկալմամբ։ Փաստորեն, ակնհայտ է նրանց նպատակը` փոխել Ցեղասպանության գաղափարախոսությունը…
-Ցեղասպանության փաստն անհերքելի է և որևիցե մեկը չի պատրաստվում քննարկել ցեղասպանության եղելության հարցը։ Իսկ ինչ վերաբերում է արձանագրություններին և տարբեր տեսակի հանձնաժողովներին, ապա միջկառավարական հանձնաժողովի ենթահանձնաժողովներից մեկը զբաղվելու է երկու ժողովուրդների միջև փոխվստահության վերականգնման հարցերով։
– «Խաղաղությունը կտիրի այն ժամանակ, երբ այն վերաբերի բոլորին, որ… Ադրբեջանի տարածքային ամբողջականությունը պահպանվի։ Արձանագրությունը պետք է այսպես ընկալել»,- ասել է Դավութօղլուն։ Սրանով նա մեկ անգամ ևս ակնարկում է Ղարաբաղյան խնդրի կարգավորման իրենց տարբերակը…
-Դա նրանց իրավունքն է։ Հայկական կողմը ղարաբաղյան խնդիրը երբևէ թուրքական կողմի հետ չի քննարկել։
Armar.am
Դիտել Լրահոս, Հարցազրույցներ բաժնի բոլոր նյութերը
