ՀՅԴ Բյուրոյի Հայ դատի և քաղաքական հարցերի գրասենյակի պատասխանատու Կիրո Մանոյանի խոսքերով, ԱՄՆ նախագահ Բարակ Օբաման պետք է գիտակցի, որ իր կողմից Հայոց Ցեղասպանության չճանաչումը դեռ չի նշանակում, թե ԱՄՆ որևէ նահանգ ևս չպետք է ճանաչի Ցեղասպանությունը:

Այսօր մամուլի ասուլիսում Կիրո Մանոյանն անդրադարձավ Կալիֆորնիայի վերաքննիչ դատարանի կողմից Օսմանյան կայսրությունում Ցեղասպանության զոհերի հարազատներին ապահովագրական փոխհատուցում տալու մասին օրենքը չեղյալ հայտարարելու որոշմանը` նշելով, որ հայկական կողմը պատրաստվում է բողոքարկել այն:

Կ. Մանոյանը կարծում է, որ եթե վճիռն անփոփոխ մնա, ապա Թուրքիան կարող է ճնշում գործադրել Ցեղասպանությունը ճանաչած մյուս նահանգների վրա` պահանջելով որոշումը ճանաչել հակասահմանադրական, ինչպես նաև խոչընդոտել 106 բանաձևի մուտքը ԱՄՆ Կոնգրես: « Վճիռը պետք է բողոքարկել ԱՄՆ սահմանադրական դատարան», իսկ դրա համար անհրաժեշտ հիմքեր կան, այսպես` նախատեսված 12 դատավորի փոխարեն հայցը քննել են, ընդամենը` երկու, իսկ վճիռը կայացրել են` երեք դատավորներ:

Ամերիկայի Հայ Դատի հանձնախումբը արդեն նամակ է հղել նախագահ Օբամային` նշելով, որ ԱՄՆ նախագահի կողմից «Հայոց ցեղասպանություն» բառակապակցության չօգտագործումը չի նշանակում, որ պետք է առհասարակ ԱՄՆ-ում  արգելք դրվի այդ բառակապակցության օգտագործման  վրա։ Նրանք կոչ են արել Օբամային մերժել Դաշնային վերաքննիչ դատարանի վճիռը։