Անգլիական Պառլամենտի  Լորդերի պալատի փոխխոսնակ բարոնուհի Քերոլայն Քոքսի ուղեկցությամբ Արցախ էր ժամանել այցելուների հերթական խումբը: Խմբի անդամներն անգլիական եկեղեցու ներկայացուցիչներն են` Անգլիայից, ԱՄՆ-ից եւ Ավստրալիայից: Խումբը Հայաստանի Հանրապետությունում և Արցախում կլինի սեպտեմբերի 10-17-ը: Հյուրերն այս այցելությունը համարում են  ուխտագնացություն:

Երկօրյա այցով Արցախ ժամանած ուխտագնացների խումբն այցելեց  արցախյան պատերազմում զոհված ազատամարտիկների թանգարան:   Սա խմբի անդամների առաջին ծանոթությունն էր Արցախի ու արցախցիների հետ:

Նախաձեռնության հեղինակը խոստովանում է, որ վաղուց էր հետաքրքրված Հայաստանով ու  հայությամբ:

«Դուք` հայերդ, հին ու գեղեցիկ պատմություն ունեք: Ցավոք, ձեր պատմությունը, որ այդքան կարևոր է համայն աշխարհի քրիստոնյաների համար, այսօր շատ քիչ է ներկայացված, և միջազգային հանրությունը շատ քիչ բան գիտի աշխարհում  առաջինը քրիստոնեությունն ընդունած ազգի մասին»,- նկատում  է Չարլզ Բրադշոուն:

«Պատահական չի ընտրվել նաև ուխտագնացության վայրը: Անշուշտ, այստեղ մեծ դեր է կատարել նաև բարոնուհի Քոքսը», խոստովանում է խմբի ղեկավար Չարլզ Բրադշոուն. «Երկար տարիներ երազում էի Հայաստան ու Ղարաբաղ այցելել հենց բարոնուհու ուղեկցությամբ, քանի որ նրա  ուղեկցությամբ այս երկիրը ճանաչելու ավելի մեծ հնարավորություն կունենանք, և դա կլինի ավելին, քան զբոսաշրջությունը»:

Սա արցախցիների վաղեմի բարեկամի արդեն 69-րդ այցն է:   Անգլիական Պառլամենտի  Լորդերի պալատի փոխխոսնակ Քերոլայն Քոքսը  հյուրերի հերթական այցը հենց այս թանգարանից սկսելը օրինաչափ է համարում:«Արցախի հետ ծանոթությունը պետք սկսել հենց այս թանգարանից:  Այս տղաներն իրենց կյանքն են նվիրաբերել Արցախի անկախության համար»:

Հյուրերը կլինեն նաև Ստեփանակերտի վերականգնողական կենտրոնում:

«Ես միշտ էլ ասել եմ, որ դուք ունեք մոխիրներից  հառնելու զարմանալի կարողություն»,- նշեց  Քերոլայն Քոքսը,- «դրա լավագույն խորհրդանիշը հենց վերականգնողական կենտրոնն է, որն իր ձեռքբերումներով կարող է օրինակ ծառայել շատ երկրների համար»:

Ուխտավորները կայցելեն նաև Գանձասար:  Նախատեսվում է հանդիպում Արցախի թեմի առաջնորդ Պարգև արքեպիսկոպոս Մարտիրոսյանի  հետ:

Նորայր ՀՈՎՍԵՓՅԱՆ

Ստեփանակերտ