Այսօր   Մարտակերտի շրջանում նոր  բնակավայր հիմնադրվեց: Անգամ անբարենպաստ եղանակն ու հորդառատ անձրևը   չխանգարեցին  Նոր Կիլիկիա բնակավայրի հիմնարկեքի արարողությանը:  Մարտակերտի շրջանի Կիչան և Նոր Ղազանչի   համայնքների   հարևանությամբ կառուցվելու  է   առաջին թաղամասը: Բարեգործական ծրագրի   նախաձեռնողն ու ‎ֆինանսավորողը Մեծի Տանն Կիլիկիո  կաթողիկոսությունն է: Ավանի անունն էլ խորհրդանշական է` Նոր Կիլիկիա:

Նոր Կիլիկիայում  բնակություն կհաստատեն    Կիչան  և   Նոր Ղազանչի համայնքների այն ընտանիքները, որոնք   բնակարանային խնդիրներ ունեն:

Մինչև տարեվերջ   նախատեսվում է կառուցել  3 սենյականոց  10 առանձնատուն:  Յուրաքանչյուր բնակարանի կառուցման եւ տնամերձի համար  կհատկացվի 1200 քմ  հողատարածք:  Բնակարանները կհանձնվեն  ամբողջությամբ  պատրաստի վիճակում: Շինարարական   աշխատանքներն իրականացնում է  ՙIDC՚   ընկերությունը:

Բարեգործական այս ծրագրով  որոշ չափով կլուծի նաև Նոր Ղազանչի  և Կիչան  համայնքներում ապրող զոհված ազատամարտիկների, բազմազավակ  ընտանիքների   բնակարանային    խնդիրները:   Լավատեսական տրամադրություններով էին համակված գյուղի մեծերը, քանզի իրենց գյուղերի հարևանությամբ նոր բնակավայրի հիմնադրումը հույս է ներշնչում, որ ի վերջո, կլուծվեն երիտասարդ ընտանիքների բնակարանային խնդիրն ու նրանք ստպված չեն լինի լքել հայրենի գյուղը:

Նախանշվող շինարարական ծավալուն աշխատանքները գյուղի բնակիչների համար նաև լրացուցիչ աշխատատեղեր կստեղծեն: Շինարարության ընթացքում    կօգտագործվի հիմնականում տեղի աշխատուժը:

Հուսանք` Նոր Կիլիկիայում կառուցվող  10 բնակարաններին հետագայում   կավելանան նորերը:

Իսկ որ գյուղն անպատճառ եկեղեցի է ունենալու`  այսօր  արդեն  որոշված է:

Նորայր Հովսեփյան

Ստեփանակերտ