ՀՀ կառավարությունը գյուղտնտեսություններին օգնելու նպատակով որոշում է ընդունել Վանաձորի քիմիական գործարանում վերականգնել պարարտանյութի արտադրությունը: Ըստ այդմ, նախատեսվում է այս տարվա 4-րդ եռամսյակում արտադրել 3 հազար տոննա ազոտական պարարտանյութ, իսկ 2010թ.-ին` 25-30 հազար տոննա: Այս մասին մեր թղթակցին հայտնեց ՀՀ գյուղատնտեսության փոխնախարար Սամվել Գալստյանը:

Փոխնախարարի փոխանցմամբ, վերջին 6-7 տարիների ընթացքում Հայաստանում տարեկան օգտագործվել է 35-42 հազար տոննա պարարտանյութ: Այս տարի արդեն իսկ Հայաստան է ներկրվել ավելի քան 30 հազար տոննա ազոտական պարարտանյութ: Ս.Գալստյանի խոսքերով,  Վանաձորի քիմիական գործարանում պարարտանյութի արտադրության վերականգնման շնորհիվ հնարավոր կլինի Հայաստանում բավարարել ազոտական պարարտանյութի ներքին պահանջարկը:

Նշենք, որ մինչև Խորհրդային միության փլուզումը Հայաստանում, մասնավորապես, Վանաձորի քիմիական գործարանում, արտադրվում էին տարբեր տեսակի քիմիական նյութեր, որոնց միացությունից ստացվում էր ազոտական պարարտանյութ:

Հ.Հ.

Թեգեր` ՀՀ գյուղատնտեսության փոխնախարար Սամվել Գալստյան