Վերջին օրերի ամենահրատապ թեման հայ-թուրքական նախաստորագրված արձանագրություններն են և դրանց վավերացումից հետո սպասվող հնարավոր վտանգավոր հետևանքները:

Ընթացող քննարկումները հիմնականում վերաբերվում  են այն խնդրին, թե   փաստաթղթի ստորագրումը, արդյոք, չի՞ ունենա ՀՀ-ի համար անդառնալի հետևանքներ, մասնավորապես,  Հայոց Ցեղասպանության ճանաչման գործընթացի կասեցում և ԼՂՀ հարցի ոչ հայանպաստ լուծում:

Անդրադառնալով այս  անհանգստություններին  ՀՀԿ խմբակցության քարտուղար Էդուարդ Շարմազանովը նկատեց, թե Ցեղասպանության հարցը երբեք չի կարող դառնալ նախապայման և  Թուրքիան իրավունք չունի Հայաստանից պահանջել հրաժարվել Ցեղասպանության  ճանաչման գործընթացից:

Նույնկերպ և, ըստ Շարմազանովի,  Լեռնային Ղարաբաղի հարցը չի’ կարող դառնալ որպես նախապայման: ՀՀԿ պատգամավորը հիշեցրեց ԱՄՆ նախագահ Բարաք Օբամայի օրերս արած հայտարարությունը , թե Հայաստան-Թուրքիա գործընթացը որևէ կապ չունի Լեռնային Ղարաբաղի  գործընթացի հետ: «Սա մեկ անգամ վերահաստատեց պաշտոնական Վաշինգտոնի դիրքորոշումը, որ հայ-թուրքական հարաբերությունների կարգավորումը պետք է լինի միմիայն առանց նախապայմաններ»:

«Ես կարծում եմ,  որ ՀՀ նախագահի այս քայլը շատ խիզախ քայլ է և մենք պետք է բոլորս  ավելի միավորվենք, չփնտրենք թշնամիներ, հայրենասերներ, դավաճաններ   և յուրաքանչյուրս մեր ներուժը ներդնենք որպեսզի հզորանա Հայաստանը, իսկ Հայաստան-Սփյուռք կապերն առավել ամրանան:

Շարունակելով թենան, բանախոսը նաև նշեց, թե արվում են անհեթեթ հայտարարություններ, հնչում են  մեղադրանքներ, որոնք իրականության հետ ամենևին կապ չունեն, դրանք լսելիս տպավորություն է ստեղծվում, թե Կարսը 20 թ-ին ՀՀԿ-ն ու Սերժ Սարգսյանն են թուրքին  հանձնել: «Ոչ  Բաթումի պայմանագիրը, ոչ Ալեքսանդրապոլի ու Կարսի պայմանագրերը, ոչ էլ Մոսկվայի պայմանագիրը Հանրապետականն ու Սերժ Սարգսյանը չեն կնքել. ասեմ ավելին,Սերժ Սարգսյանի ստորագրությունը կա 1994թ-ի մայիսին կնքված Ղարաբաղյան պատերազմի զինադադարի  փաստաթղթի տակ, որն արձանագրում է հայ ժողովրդի փառահեղ հաղթանակը Արցախյան հերոսամարտում»:

Շարունակելով Ղարաբաղի թեման Էդուարդ Շարմազանովը հիշեցրեց, որ մինչ այս ոչ մի օր ԼՂՀ-ն չի եղել ազատ և անկախ Ադրբեջանի կազմում, նա նշեց, որ խոսելով Ադրբեջանի տարածքային ամբողջականության մասին թե’ Թուրքիան , թե’ Ադրբեջանը,  և թե միջազգային դիտորդները շատ լավ գիտակցում են , որ Լեռնային Ղարաբաղի Հանրապետությունը որևէ կապ չունի Ադրբեջանի տարածքային ամբողջականության հետ. «ԼՂՀ-ն ԽՍՀՄ սահմանադրությամբ և միջազգային  գործող նորմերին համապատասխան հռչակեց իր անկախությունը և այսօր փաստացի անկախ հանրապետություն է` ավելի զարգացած ժողովրդավարական ինստիտուտներով,  քան  Ադրբեջանը»:

Կարինե Պետրոսյան

Թեգեր` Բարաք Օբամա, Լեռնային Ղարաբաղի Հանրապետություն, Հայաստան-Սփյուռք, Ցեղասպանության հարցը